Onlayn alış-verişin standart həyat tərzinə gəldiyi rəqəmsal əsrdə alıcıların ən böyük qayğılarından biri tələb etdikləri orijinal məhsulların saxta məhsullarla əvəzlənməsidir.
İqtisadiyyat.az dünya mediasına istinadən xəbər verir ki, gömrükdə müsadirə edilən bütün saxta malların yarısından çoxu onlayn mağazalardan gəlir.
Vaşinqtonda yerləşən Alitheon şirkəti tərəfindən hazırlanan “FeaturePrint” adlı yeni proqram bu narahatedici vəziyyətə son qoymağı hədəfləyir.
Süni intellektin (AI) gücündən istifadə edərək, bu proqram smartfonla çəkilmiş bir şəkil ilə saxta əşyaları müəyyən etmək və onları orijinal analoqlarından fərqləndirə biləcək. Barkodlara, stikerlərə, markerlərə və ya RFID texnologiyasına əsaslanan ənənəvi üsullardan fərqli olaraq, “FeaturePrint” məhsulların autentifikasiyası üçün optik texnologiyadan istifadə edir. Xidmət xüsusi brauzerlərə və ya kameralara ehtiyacı aradan qaldıraraq, smartfonu olan hər kəsə girişi təmin etmək məqsədi daşıyır. İstifadəçilər əşyanın şəklini çəkirlər və proqram məhsulun orijinallığını yoxlayaraq, tədarük zəncirinə nəzarət edirlər.
