Böyük Britaniyanın Baş naziri Keir Starmer və Fransa Prezidenti Emmanuel Makron Yaxın Şərqdə son günlər artan zorakılıqdan narahat olduqlarını ifadə edərək, tezliklə atəşkəs razılaşmasının əldə olunmasının zəruriliyi barədə razılığa gəliblər.
İqtisadiyyat.az xəbər verir ki, bu barədə Britaniya hökuməti başçısının Parisdə Makronla apardığı danışıqların yekunları üzrə yaydığı bəyanatda deyilir.
"Yaxın Şərqdəki kövrək vəziyyətə toxunan Baş nazir son günlər İordan çayının qərb sahilində eskalasiyadan çox narahat olduğunu bildirib. Liderlər atəşkəs danışıqlarının təcili və effektiv şəkildə yekunlaşdırılmasının zəruriliyi barədə razılığa gəliblər. Həm israillilər, həm də fələstinlilər üçün uzunmüddətli təhlükəsizliyi təmin edə biləcək Fələstin dövləti ilə İsrail Dövləti arasında birgəyaşayış üçün geridönməz yol yaradan siyasi həll yolunun tapılmasının vacibliyi vurğulanıb", - deyə məlumatda qeyd edilib.
"10 Downing Street"in məlumatına görə, Starmer və Makron həmçinin gələcək aylarda Böyük Britaniya və Fransa arasında sıx əməkdaşlığın daha da gücləndirilməsi və genişləndirilməsi zərurəti ilə bağlı razılığa gəliblər.
