"Spotify" proqramdan reklamsız istifadə edən 200 milyondan çox istifadəçisi üçün abunə haqqını artırıb.

İqtisadiyyat.az dünya mediasına istinadən bildirir ki, ABŞ-dakı istifadəçilər premium abunə üçün 9,99 dollar əvəzinə 10,99 dollar ödəyəcəklər. Bu artım Böyük Britaniya, Kanada, Avstraliya və 49 digər ərazilərdə qüvvəyə minib. 

İngiltərədəki "Spotify" premium istifadəçiləri ayda 1 funt sterlinq əlavə ödəyəcəklər. Türkiyədə artım ABŞ və İngiltərədəki nisbətlərdən daha yüksək olub. Belə ki, bəzi abunə növləri 30 faizdən çox artıb. Fərdi abunə haqqı 29,99 TL-dən (1.89 AZN) 39,99 TL-yə (2.52 AZN), tələbə abunəliyi 14,99 TL-dən(0.95 AZN) 21,99 TL-yə (1.39 AZN) yüksəlib. Duo üzvlük paketi 39,99 TL-dən (2.52 AZN) 54,99 TL-yə (3.47 AZN), ailə paketi isə 49,99 TL-dən (3.15 AZN) 64,99 TL-yə (4.10 AZN) yüksəlib. 

Spotify dünya üzrə abunə haqlarının artırılması ilə bağlı açıqlamasında belə deyib:

“Dünyanın bir çox bazarlarında tətbiq etmək üçün premium dərəcələrini dəyişirik ki, yenilikləri davam etdirə bilək. Bu yeniləmələr bizə platformamızda sənətçilərə və dinləyicilərə daha yaxşı xidmət etməyə kömək edəcək”.

Qeyd edək ki, "Netflix", "Apple Music", "Peacock" və "Paramount+" platformaları da son bir neçə gündə abunə haqlarını artırıb.