Sosial şəbəkələr artıq insanların həyatının bir hissəsinə çevrilib. Bununla yanaşı ara-sıra sosial şəbəkələrin çökməsi hallarına rast gəlinir. Bir neçə gün əvvəl də "Meta"ya məxsus "Facebook" və "İnstagram" sosial şəbəkələrində bir neçə saatlıq problem yaranıb. Həmin vaxt istifadəçilərin hesablarına giriş imkanları məhdudlaşdırılıb. Bu isə təhlükəsizlik baxımından bir sıra suallar doğurur.

Azərbaycan İnformasiya və Kommunikasiya Texnologiyaları Sənayesi Assosiasiyasının İdarə Heyətinin sədri, İKT üzrə ekspert Elvin Abbasov İqtisadiyyat.az-a açıqlamasında deyib ki, sosial şəbəkələrə girişlə bağlı yaşanan hadisə ilk deyil.

O, əvvəlki dövrlərdə də bu cür halların yaşandığını xatırladıb.

Ekspertin sözlərinə görə, xüsusən də "Meta" şirkətində sosial şəbəkələrə girişin məhdudlaşması sıx müşahidə olunur. Bu isə hər hansı kiberhücumla deyil, şirkətin daxili problemləri ilə bağlıdır.

"Təxminən 2 il əvvəl də "Meta" şirkətinin DNS lövhələri qarışdığı üçün "Facebook" və "İnstagram"a girişə bir neçə saatlıq məhdudiyyət qoyulmuşdu. Bir neçə gün öncə yaşanan hadisə də daxili problemlə bağlıdır. Müxtəlif vaxtlarda informasiya texnologiyaları məhsullarında bu cür halların yaşanması gözləniləndir. Heç bir məhsul daima problemsiz işləyəcəyinə dair 100 faizlik zəmanət vermir. Azərbaycanda da banklarda, dövlət qurumlarında sistemlərdə dayanmalar yaşana bilir. Bu isə normal haldır".

Xatırladaq ki, martın 5-də "Facebook" və "İnstagram" sosial platformalarının fəaliyyətində müəyyən problemlər yaranıb. Problemlər əsasən hesabların yenilənməməsi və hesablara girişin mümkünsüzlüyü ilə bağlı olub. İstifadəçilər bu sosial şəbəkələrə daxil ola bilməyib və daxil olmaq istəyərkən avtomatik olaraq hesablardan çıxılıb. Azərbaycanın Xüsusi Rabitə və İnformasiya Təhlükəsizliyi Dövlət Xidməti isə problemin qlobal xarakter daşıdığını açıqlayıb. 

Gülşən Şərif