Bu sözləri İqtisadiyyat.az-a açıqlamasında Milli Məclisin deputatı Azər Badamov deyib.
O bildirib ki, 2025-ci ildə dövlət büdcəmizin 41 milyard manat, icmal büdcəsinin isə 48 milyard manat nəzərdə tutulması yola saldığımız illərdə qazanılmış iqtisadi uğurlara əsaslanır: “Belə ki, keçən ildə ölkədə iqtisadi artımın 4% olması, valyuta ehtiyatlarımız 5 milyard dollar artaraq 72 milyard dolları keçməsi aparılan iqtisadi siyasi kursun uğurudur. Yəni, xarici borcumuz 5,2 milyard dollar olmaqla ÜDM-in cəmi 72%-ni təşkil edir ki, bu da valyuta ehtiyatlarımızın xarici borcumuzu 14 dəfə üstələməsi deməkdir. Amma hətta bəzi inkişaf etmiş ölkələrin xarici borcu ÜDM-in 100%-i və daha çoxdur”.
Deputat söyləyib ki, valyuta ehtiyatlarımız dövlət büdcəsi qarşısında işğaldan azad olunmuş ərazilərin yenidən qurulması və bərpası ilə bağlı böyük öhdəliklər fonunda baş verir: “Son 4 ildə işğaldan azad olunmuş ərazilərin yenidən qurulması və bərpasına 19 milyard manat sərf olunmuşdur. O cümlədən, əhalinin sosial rifahının yaxşılaşdırılmasına xidmət edən və maliyyə tutumu 7 milyard manat olan 4 sosial paket icra olunmuşdur”.
“Cari ildə də dövlət başçımızın apardığı sosial siyasət davam etdirilmiş və imzalanmış 5-ci sosial paketin icrasına başlanması sayəsində 1 yanvardan etibarən minimum əməkhaqqı 345 manatdan 400 manata, minimum əmək pensiyası isə 280 manatdan 320 manata çatdırılmış, büdcədən maliyyələşən müəyyən təşkilatlarda çalışanların əməkhaqları 15 % artırılmışdır. Amma bu artımlar 2024-cü ildə ölkədə baş vermiş 2% iqtisadi inflyasiya fonunda baş verir. Təbii ki, sosial paketlərin mütəmadi icrası dövlət başçısının siyasətinin təməlində Azərbaycan vətəndaşının rifahının dayandığını göstərir. Prezident İlham Əliyev müsahibədə bu məsələlərə də geniş yer verərək hər bir vətəndaşımızı düşündürən məlumatları geniş ictimaiyyətə çatdırmış oldu”, - deputat əlavə edib.