2021, 2022 və 2023-cü ili xalis zərərlə başa vuran "Ata Sığorta" ASC-nin səhmdarının növbəti illik ümumi yığıncağı keçiriləcək.
İqtisadiyyat.az xəbər verir ki, yığıncağın mayın 31-də keçiriləcəyi nəzərdə tutulub.
Yığıncaqda ötən ilin maliyyə ili üzrə İdarə Heyətinin, Direktorlar Şurasının hesabatı müzakirə ediləcək.
Ötən il üzrə müstəqil auditorun rəyi ilə təsdiq edilmiş maliyyə hesabatının, ASC-nin 2023-cü maliyyə ili üzrə illik hesabatlarının, mühasibat balansının, mənfəət və zərər hesabatlarının təsdiq edilməsi, mənfəətinin bölüşdürülməsi məsələləri müzakirə olunacaq.
Yığıncağa Direktorlar Şurasının üzvləri Adıgözəl Ağayev, Dəyanət Quliyev, Direktorlar Şurasının müstəqil üzvü Zəfər Muxtarov, İdarə Heyətinin sədri Seymur Əliyev və İdarə Heyəti sədrinin müavini Naim Məmmədov dəvət olunub.
Qeyd edək ki, "Ata Sığorta" ASC-nin səhmdarı "Ata Holding" MMC-dir.
Xatırladaq ki, sığorta şirkəti ardıcıl olaraq 3-cü ili də zərərlə bitirib. 2021-ci ildə 2,3 milyon manat, 2022-ci ildə 575,4 min manat xalis zərər edən sığorta şirkəti ötən ili də 947 min manat xalis zərərlə başa vurub. Başqa sözlə, 2023-cü ildə sığorta şirkətinin xalis zərəri əvvəlki ilə nisbətən 64,7% artıb.
Xalis zərərin artmasına əsas təsiri işlərin aparılması xərclərinin artılması göstərib. Belə ki, 2022-ci ildə işlərin aparaılması xərcləri 4,46 milyon manat ikən, 2023-cü ildə 5,78 milyon manata yüksəlib. Bu isə sözügedən xərclərin bir ildə 1,32 milyon manat artması deməkdir.
Bununla belə, ötən il sığorta şirkəti böyüyüb. Belə ki, 1 yanvar 2024-cü il tarixinə “AtaSığorta”nın cəmi aktivləri 15,8 milyon manata çatıb. Bu isə illik müqayisədə 12,1% çoxdur. Sığorta şirkətinin cəmi öhdəlikləri 30% artaraq 6,63 milyon manata, cəmi kapitalı isə 1,5% artaraq 9,16 milyon manata yüksəlib.
