Respublikamızın hər yerində olduğu kimi, Şirvan şəhərində də fevralın 7-də 8:00-dan növbədənkənar prezident seçkilərinə start verilib. Səhər saatlarından bütün məntəqələrdə seçici fəallığı müşahidə olunur.

İqtisadiyyat.az AZƏRTAC-a istinadən xəbər verir ki, şəhərdə fəaliyyət göstərən 51 saylı Şirvan və 68 saylı Sabirabad–Şirvan seçki dairələrini əhatə edən 47 seçki məntəqəsi səhər tezdən qapılarını seçicilərin üzünə açıb. Məntəqələrdə vətəndaşların izdihamı müşahidə olunur.

Dairə seçki komissiyalarından verilən məlumata əsasən, səsvermənin azad, demokratik və şəffaf keçməsi üçün bütün məntəqələrdə lazımi şərait yaradılıb, seçki məntəqələri zəruri texniki vasitələrlə, o cümlədən mürəkkəb balonları və ultrabənövşəyi lampalarla təchiz edilib. İki seçki dairəsinin 12 seçki məntəqəsində veb-kameralar quraşdırılıb. Seçki dairələri üzrə 57510 nəfər səsvermə hüququ olan vətəndaşın adı siyahıya alınıb, onlardan 1223 nəfər ilk dəfə səsverənlərdir.

Məntəqələrdə səsvermənin gedişini yerli və beynəlxalq müşahidəçilər izləyirlər.

Səhhəti ilə əlaqədar seçki məntəqəsinə gələrək səsvermədə iştirak edə bilməyən vətəndaşların yaşadığı evə daşınan seçki qutuları aparılır və onların seçkidə iştirakı təmin edilir.

Qeyd edək ki, budəfəki seçkilər ilk dəfə Azərbaycanın beynəlxalq səviyyədə tanınan bütün ərazilərində keçirilir.

Ölkə üzrə səsvermə hüququ olan 6 milyon 478 min 623 seçici qeydə alınıb. Seçicilər 6537 məntəqədə səs verəcəklər. İşğaldan azad edilmiş ərazilərdə 26 məntəqə fəaliyyət göstərir. Həmçinin 37 ölkədə 23 minə yaxın seçici 49 məntəqədə səs verə biləcək.

Seçkiləri izləmək üçün 90 mindən artıq müşahidəçi qeydə alınıb. Bunun 790 nəfəri beynəlxalq müşahidəçidir. Müşahidəçilərin 50 mindən çoxu isə 19 siyasi partiyanın nümayəndəsidir. Bundan əlavə, Azərbaycanda fəaliyyət göstərən 83 qeyri-hökumət təşkilatı da müşahidələr aparır. Həmçinin seçkiləri 109 beynəlxalq media qurumunun 216 nümayəndəsi izləyir.