Əmlak məsələləri üzrə ekspert Ramil Osmanlı İqtisadiyyat.az-a açıqlamasında bildirib ki, təklif artanda qiymətlərin aşağı düşməsi Azərbaycan bazarı üçün keçərli deyil.
“Deyək ki, bazarda təklif artır, tələb isə aşağıdır deyə, qiymətin də azalması prinsipi Azərbaycan bazarı üçün keçərli deyil. Hətta sahibkarlarımız da zaman-zaman bu məsələ ətrafında fikirlərini bildirərkən bəyan edirlər ki, daşınmaz əmlakın satılıb-satılmaması, yəni alqı-satqı predmentinə çevrilib-çevrilməməsi qiymətə hər hansı formada təsir göstərə bilmir, çünki sahibkarlar öz vəsaitlərindən yox, daha çox kənar maliyyə resurslarından asılıdırlar. Yəni bazar bütövlükdə ilkin mənzil bazarından idarə olunur”.
Ekspertin sözlərinə görə, təhlillər göstərir ki, Azərbaycanda daşınmaz əmlak bazarı böyük ölçüdə yeni tikililərdən və yəni ilkin mənzil bazarından asılıdır:
“İstər torpaq bazarında tələbatın formalaşması, istərsə də qeyri-yaşayış obyektlərinə tələbin formalaşması və qiymət siyasəti kimi bütün məsələlər ilkin mənzil bazarından formalaşdığına görə, ilkin mənzil bazarında sahibkar qiyməti aşağı salmadığı müddətdə ümumi bazarda qiymət azalması baş verməyəcək. Sahibkar da qiyməti azaltmayacaq, çünki özü də kənar maliyyə resurslarından asılıdır”.
