"Azərbaycanda özəl sektorun ölkənin iqtisadi inkişafına töhfəsinin artırılması istiqamətində aparılan islahatlar sahibkarların iqtisadi əməliyyatlarının şəffaflaşmasını, ədalətli rəqabət mühitində inkişaf etməsini və yeni daimi iş yerlərinin yaradılmasını hədəfləyir".
İqtisadiyyat.az xəbər verir ki, bu sözləri İqtisadiyyat Nazirliyi yanında Dövlət Vergi Xidmətinin (DVX) rəis müavini Samirə Musayeva bildirib.
Onun sözlərinə görə, qeyri-neft sektorunun özəl bölməsində şəffaflaşma istiqamətində aparılan ən efffektiv islahatlardan biri məhz əmək bazarında şəffaflığa nail olmağa yönəlib: "2019-cu ildə başlamış islahat nəticəsində əmək münasibətlərinin leqallaşması istiqamətində ciddi irəliləyişlərə nail olundu. Belə ki, qeyri-neft sektorunun özəl bölməsində 8 min manatadək aylıq əməkhaqqı gəlirlərinin vergidən azad olunması nəticəsində əməkhaqları üzrə vergi yükü əhəmiyyətli dərəcədə azaldı və biznesin əmək münasibətlərini rəsmiləşdirmə, əməkhaqqı məbləğlərini dürüstləşmə istiqamətində motivasiyası artırıldı".
"Bütövlükdə islahatın başladığı tarixdən sonra rəsmi əmək münasibətlərinin sayında 32 faiz artım müşahidə olundu ki, bu artım qeyri-neft sektorunun özəl bölməsində 80 faizə yaxınlaşdı. Bu isə 451 min yeni əmək müqaviləsi deməkdir. Əgər əvvəl özəl sektorun cəmi əmək müqavilələrində payı 37,1 faiz idisə, islahatdan sonra bu rəqəm 52,4 faizə çatdı. Bu, təbii ki, əməkhaqqı fondunda artımla müşahidə edilir. Belə ki, 2018-ci illə müqayisədə 2024-cü ilin əvvəlinə əməkhaqqı fondu 2,3 dəfə, qeyri-neft sektorunun özəl bölməsində isə 2,4 dəfə artdı və nəticədə sosial yığımların həcmi 2,2 dəfə çoxalmış oldu", - rəis müavini söyləyib.
S.Musayeva əlavə edib ki, görülən işlərin nəticəsi olaraq, islahatlar Harvard universitetinin ekspertləri tərəfindən yüksək qiymətləndirilir: "Universitetin "Growth Lab" Mərkəzi ölkə iqtisadiyyatının diaqnostik qiymətləndirilməsi zamanı əmək bazarının şəffaflaşması sahəsində aparılan islahatları da araşdırır. Bu nəticələr isə leqallaşma istiqamətində aparılan effektiv islahat kimi digər ölkələrin də öyrənməli olduğu uğur hekayəsi kimi qiymətlənirilib. İslahatlar bütövlükdə bizneslərin leqallaşması istiqamətində səmərli hesab edilməklə yanaşı analoji problemlərlə qarşılaşan digər ölkələrə Azərbaycan modelinin araşdırılması tövsiyə edilib. Bu barədə məlumatlar artıq Harvard universitetinin "Growth Lab" Mərkəzinin müxtəlif sosial şəbəkə resurslarında da yerləşdirilib".
İsmayıl Bakuvi
