"ABŞ Administrasiyası hesab edir ki, Yaxın Şərqdə genişmiqyaslı müharibə riski qalmaqdadır". 

İqtisadiyyat.az xəbər verir ki, bu barədə ABŞ Prezidentinin milli təhlükəsizlik üzrə köməkçisi Ceyk Sallivan Ağ Evdə jurnalistlər üçün keçirdiyi brifinqdə bildirib.

Ondan Yaxın Şərqdə genişmiqyaslı müharibənin başlamasının nə qədər real olduğunu qiymətləndirməsi istənilib. "Biz bütün diqqətimizi regionda böyük müharibənin qarşısını almağa çalışmağa yönəltmişik. Risk həmişə olub və bu gün də qalmaqdadır. Biz inanırıq ki, indi həqiqətən intensiv səylər göstərməliyik. Çəkindirmə vasitəsi ilə, eskalasiyanın qarşısını almaqla, diplomatiya yolu ilə daha böyük müharibənin qarşısını almaq lazımdır. Bunu etməyə davam edəcəyik", - Sullivan cavab verib.

Jurnalistlər ondan HƏMAS Siyasi Bürosunun rəhbəri İsmayıl Haniyənin öldürülməsinin Qəzzada atəşkəs və girovların mübadiləsi ilə bağlı İsrail və Fələstin hərəkatı arasında məsləhətləşmələrə necə təsir edəcəyini də soruşublar. Diplomat müvafiq suala isə belə cavab verib: "Onun ölümünün danışıqlara necə təsir edəcəyini söyləmək hələ tezdir, ona görə də mən bu barədə spekulyasiya etməyəcəm, xüsusən də hazırda regionda cərəyan edən daha geniş dinamika və hadisələr fonunda. Deyəcəyim budur: atəşkəs və girovlarla bağlı razılaşma getmək üçün effektiv yoldur. Bu müharibəni bitirmək lazımdır. Bu, bütün girovları evlərinə qaytarmaq üçün əsas yoldur. Və biz buna nail olmağa sadiq qalırıq".