Premyer Liqada son həftələrdə aldığı nəticələrlə çempionluq yarışında böyük itki ilə üzləşən "Liverpul" "Vest Hem Yunayted" səfərindən 1 xalla ayrılıb.

İqtisadiyyat.az xəbər verir ki, ilk hissənin böyük hissəsinin qolsuz keçdiyi matçın 43-cü dəqiqəsində “Vest Hem Yunayted” Jarrod Bowenin qolu ilə önə keçib və ilk hissə bu hesabla bitib.

İkinci hissənin əvvəlində 48-ci dəqiqədə Endryu Robertsonla hesabı bərabərləşdirən “Liverpul” 65-ci dəqiqədə Alfons Areolanın avtoqolu ilə önə keçib. Ev sahibi “Vest Hem Yunayted” 77-ci dəqiqədə hücumçu Mixail Antonio ilə yenidən hesabı bərabərləşdirib.

Qarşılaşmanın qalan dəqiqələrində heç bir komanda qol vura bilməyib, görüş 2:2 hesablı bərabərliklə yekunlaşıb. Bu nəticə ilə "Liverpul" xallarını 75-ə, "Vest Hem Yunayted" isə 49-a yüksəldib.

"Liverpul"un ulduzu Məhəmməd Salah "Vest Hem Yunayted"lə matça ehtiyat oyunçular skamyasında başlayıb.

Ulduz futbolçu matçın 79-cu dəqiqəsində oyuna daxil olarkən "Liverpul"un baş məşqçisi Yurgen Kloppla qısa müddət ərzində mübahisə edib.