"Sahibsiz avtomobillərin utilizasiyaya verilməsi avtomobillərin qiymətinə ciddi təsir etməyəcək".

Azərbaycanda sahibsiz hesab edilən avtomobillər utilizasiyaya veriləcək. Nəzərdə tutulan dəyişiklik "İstehsalat və məişət tullantıları haqqında" qanuna yeni əlavə edilən 14-7-ci maddədə (Nəqliyyat vasitələrinin utilizasiyaya verilməsi) əksini tapıb. Hesab olunur ki, bu dəyişiklik avtomobillərin qiymətinə təsirsiz ötüşməyəcək və bahalaşma baş verə bilər.

Yeni qərarın avtomobil bazarındakı vəziyyətə mümkün təsirləri ilə bağlı  nəqliyyat məsələləri üzrə ekspert Aslan Əsədov öz fikirlərini İqtisadiyyat.az-la bölüşüb.

O, qeyd edib ki, avtomobil sahibləri sahibsiz avtomobillərin utilizasiyası məsələsində diqqətli davranmalıdırlar. Əks halda onlar işbazların qurbanı ola bilərlər:

"Sahibsiz hesab edilən avtomobillərin utilizasiyaya verilməsi gözlənilən idi. Bu qərar avtomobil parkının yenilənməsi üçün nəzərdə tutulmayıb. Əsas məqsəd dövriyyədə olan köhnə avtomobillərin sıradan çıxarılmasıdır. Sahibsiz dedikdə sahibi rəhmətə getmiş, etibarnaməsinin müddəti bitmiş, sənədləri qaydasında olmayan avtomobillər nəzərdə tutulur. Bu avtomobillərin payı təxminən 1 faiz civarındadır.

Sahibsiz avtomobillərin utilizasiyaya verilməsi avtomobillərin qiymətinə ciddi təsir etməyəcək. Sadəcə bəzi işbazlar ehtiyat hissələri nöqteyi-nəzərindən vəziyyətdən sui-istifadə etməyə çalışacaqlar".

Gülşən Şərif