Gürcüstanın sabiq prezidenti Mixail Saakaşvili ağır vəziyyətdədir. Bu barədə o özü “Sky News”a açıqlamasında bildirib. Saakaşvili telekanalın suallarını vəkil vasitəsilə yazılı olaraq cavablandırıb: "Mən əvvəl 120 kiloqram idim, amma indi 64 kiloqram çəkiyə düşmüşəm. Həkimlər məndə orqan çatışmazlığı proqnozlaşdırır. Sümüklərim parçalanır və dözülməz ağrılardan əziyyət çəkirəm. Mən ölüm ayağındayam". Bu sözləri sabiq prezidentin vəkili Şalva Xaçapuridze də təsdiqləyib.

Xatırladaq ki, Mixail Saakaşvili 2021-ci il oktyabrın 1-i Tbilisidə saxlanıldığı gün aclıq aksiyasına başlamışdı. O, 50 günlük aksiyadan sonra Qori hərbi hospitalında reabilitasiya kursu keçmiş, 2021-ci il dekabrın 30-na keçən gecə isə 12 saylı Rustavi həbsxanasına köçürülmüşdü. Saakaşvili 2022-ci ilin mayında uzun müddət davam edən aclıq aksiyasından sonra müalicə alması üçün Tbilisidə klinikaya köçürülüb. Gürcü siyasətçi bundan əvvəl iki cinayət işi üzrə qiyabi olaraq mühakimə olunub və ümumilikdə 6 il müddətinə azadlıqdan məhrum olunub.

Qeyd edək ki, Avropa Parlamenti Gürcüstanı Mixail Saakaşvilini əfv etməyə və azad etməyə çağıran qətnamə qəbul edib.