"Qızılca ilə mübarizədə yeganə yol peyvənd olunmaqdır".
Bunu İqtisadiyyat.az-a açıqlamasında Azərbaycan Tibb Universitetinin (ATU) Uşaq Xəstəlikləri kafedrasının professoru, tibb elmləri doktoru, sabiq baş pediatr Nəsib Quliyev deyib.
Onun sözlərinə görə, bu il qızılca xəstəliyinin sürətlə yayılmasının səbəbi peyvəndlənmə faizinin aşağı olmasıdır: "Xüsusən də COVID-19 pandemiyası meydana çıxandan sonra peyvəndləmə səviyyəsi çox aşağı düşdü və nəticədə bu il qızılca xəstəliyinə yoluxanların sayı artdı. Yoluxmanın qarşısını almaq üçün kütləvi peyvəndlənmə işləri aparılmalıdır. Çünki xəstəliyin qarşısının alınmasında çətin vəziyyət yarana bilər".
Peyvəndin əks təsirləri məsələsinə də toxunan professorun sözlərinə görə, vaksinasiyanın bir sıra xəstəlikləri yaratması ilə bağlı fikirlər uydurmadır: "Elə xəstəliklər var ki, peyvəndlə idarə olunur. Əgər peyvənd olunmasa, xəstəlik yayılacaq. Qızılca, difteriya kimi xəstəliklərin qarşısını ancaq peyvəndlə almaq mümkündür. Peyvədlənmə keçən əsrin 60-cı illərindən tətbiq olunur. Qızılcanın peyvənddən başqa müalicə metodu yoxdur. Ona görə də mübarizə metodu kimi irəli sürülən addımlara mütləq əməl olunmalıdır".
Gülşən Şərif
