"Oğlumun Vətənə qaytarılması xəbərini hansı sevinc hissi ilə qarşıladığımı ifadə etməkdə çətinlik çəkirəm".

Bu sözləri İqtisadiyyat.az-a açıqlamasında fevralın 28-də azaraq Ermənistana keçən və bu gün Vətənə qaytarılan Azərbaycan Ordusunun əsgəri Ruslan Pənahovun atası Eldəniz Pənahov deyib.

"Övladımın Bakıya gətirilməsi xəbəri bizə - ailəmizə böyük sevinc yaşatdı. Çox şükür. Nə hisslər keçirdiyimi dillə ifadə edə bilmirəm. Allah dövlətimizi, Prezidentimizi qorusun. Bu hissləri heç cür izah edə bilmirəm. Fikrimi dəqiq çatdıra bilmirəm. Sevincliyik və xoşbəxtik". 

Xatırladaq ki, fevralın 28-də səhər saatlarında Azərbaycan Ordusunun əsgəri Ruslan Eldəniz oğlu Pənahov Laçın rayonu ərazisindəki xidməti mövqelər arasında hərəkət edərkən əlverişsiz hava şəraitində istiqaməti itirərək azıb.

Daha Sonra Ermənistan İstintaq Komitəsi onun Cinayət Məcəlləsinin bir neçə maddəsi "sərhədi qanunsuz keçmək", "silah gəzdirmək" və s. ilə ittiham olunduğunu bildirib.

Ermənistan Milli Təhlükəsizlik Xidmətinin martın 4-də yaydığı məlumatda onun Azərbaycana təhvil verilməsi ilə bağlı qərar qəbul olunduğu bildirilib.

Sadiq Cavadov