"Fernando Santuş təcrübəsinin hesabına Azərbaycan millisinə xeyir verəcək".
Bu sözləri İqtisadiyyat.az-a açıqlamasında Azərbaycan millisinin sabiq futbolçusu Ruslan Əmircanov deyib.
O, Fernando Santuşun milliyə gətirilməsinə sevindiyini bildirib: "Elə bir mütəxəssis gəlib ki, futbolun içində olan adamdır. Futbol nailiyyətlərinə görə, Portuqaliya millisində verdiyi nəticələrə görə dünyada tanınan bir məşqçidir. Səhv etmirəmsə uzun müddətli müqavilə imzalanacaq. Mətbuatdan həm milli komandanın, həm də uşaq futbolunun necə inkişaf etdirilməsi ilə bağlı proqram hazırlanacağını və ona həvalə ediləcəyini oxudum".
"Avropa ölkələrinin hamısında uşaq futbolunun təməl, infrastruktur və inkişaf proqramları yüksək səviyyədə icra edilir. O baxımdan Santuşun bizə çox köməyi dəyəcək. Ölkəmizdə uşaq futbolu axsadığından, onun təcrübəsinin hesabına Azərbaycan futboluna, uşaq futbolundan başlayaraq əsas milliyə kimi xeyri dəyəcək", - o əlavə edib.
Qeyd edək ki, Fernando Santuşla bu gün rəsmi müqavilə imzalanacaq.
