ABŞ administrasiyası Rusiyanın qlobal sanksiyalardan xilas olmasına kömək edən şəbəkə ilə əlaqəli olduqlarını əsas gətirərək bir çox ölkədən 22 nəfər və şirkətə sanksiya tətbiq edib.
İqtisadiyyat.az xəbər verir ki, ABŞ Maliyyə Nazirliyindən verilən açıqlamada, sözügedən sanksiya qərarı ilə Rusiyanın hərbi-sənaye kompleksini dəstəkləmək və qlobal sanksiyalardan qaçmaq məqsədi daşıdığı bildirilib.
Açıqlamada qeyd edilib ki, sözügedən şəbəkə Rusiya və Rum Kiprdə yerləşən silah alverçisi İqor Zimenkov tərəfindən idarə olunub və şəbəkədə iştirak edən şəxslər Rusiyanın müdafiə qabiliyyətinin inkişafı ilə bağlı layihələrdə, o cümlədən yüksək səviyyəli silahların tədarükü ilə bağlı layihələrdə iştirak ediblər.
Sanksiyaya məruz qalanlar arasında Sinqapur, Kipr, Bolqarıstan və İsraildə yerləşən şirkətlər də var.
