Rusiya benzinin ixracına qoyulan qadağanı avqustun 1-dən yenidən uzatmaq niyyətindədir. Ölkənin Baş nazirinin müavini Aleksandr Novakın sözlərinə görə, hökumət benzin ixracına qoyulan qadağanın müddətinin uzadılmasını dəstəkləyir. Xatırladaq ki, Rusiya bu il altı ay müddətinə avtomobil benzininin ixracına qadağa qoyub. Hökumət bu addımını yay tətili və tarla işləri, eləcə də neft emalı zavodlarında planlı təmir işləri zamanı tələbatın artmasını kompensasiya etməklə əsaslandırıb. 

Rusiya benzin ixracına qadağanın müddətini uzadarsa, bu, Azərbaycana necə təsir edəcək?

İqtisadçı ekspert Natiq Cəfərli İqtisadiyyat.az-a açıqlamasında Azərbaycanla Rusiya arsında özəl müqavilələrin olduğunu xatırladıb.

O bildirib ki, belə müqavilələrdə həmçinin yanacaq ixracatına qadağalarda müəyyən məhdudiyyətlərin aradan qaldırılma mexanizmləri də nəzərədə tutulub: “Ona görə də, düşünürəm ki, Azərbaycan Rusiyadan yanacaq almaqda davam edə bilər. Amma həcmlər azala bilər. Lakin o da var ki, iyun ayında Azərbaycanda neftayırma zavodlarında yenidənqurma işlərinin bir hissəsi başa çatıb və daxili istehsal artır. Ola bilər ki, daxili istehsalın artımı bu problemin həllində yardımçı olsun. Çünki Rusiyadan başqa Aİ-92 markalı benzini digər yerdən almaq mümkün deyil. Bu, bircə Qazaxıstandan mümkündür. Çünki Avropada ekoloji standartlara cavab vermədiyinə görə artıq Aİ-92 markalı benzin istehsal olunmur”.

Sadiq Cavadov