İqtisadiyyat.az xəbər verir ki, bu barədə Dövlət Dumasının mətbuat xidməti məlumat yayıb.

Qanun layihəsinə əsasən, 2025-ci ildə Rusiya Federasiyası büdcəsinin gəlirləri 38,5 trilyon rubl təşkil edəcək ki, bu da ÜDM-in 17,4%-nə bərabərdir. Bu məbləğin 8,317 trilyon rublluq hissəsi neft gəlirləri, 30,188 trilyon rublluq hissəsi isə qeyri-neft gəlirləri hesabına formalaşacaq. Qeyri-neft gəlirləri isə müəyyən vergi və qeyri-vergi ödənişlərinin artımı hesabına əlavə 829,2 milyard rubl artacaq.

İzah edici qeyddə bildirilir ki, daxilolmaların artırılması əlavə dəyər vergisi də daxil olmaqla bir sıra vergi və qeyri-vergi gəlirləri üzrə proqnozların yüksəldilməsi ilə bağlıdır. Bu da nominal ÜDM-in artımı və vergi yığılmasının yüksəlməsi fonunda, eyni zamanda rubl ifadəsində idxalın həcminin azalması ilə əlaqələndirilir.

Büdcənin xərcləri isə 42,298 trilyon rubl olaraq müəyyən edilib və büdcə kəsiri 3,8 trilyon rubl səviyyəsində olacaq. 2025-ci il üçün neftin qiymətinə dair proqnoz da aşağı salınıb – əvvəlki $69,7-dən $56-a endirilib.

Qeyd olunur ki, dəyişikliklər yalnız cari ilin büdcəsinə aiddir – daha əvvəl təsdiq olunmuş 2026 və 2027-ci illər üçün büdcə layihələrində dəyişiklik edilməyib.