İqtisadiyyat.az xəbər verir ki, bu barədə TASS agentliyi məlumat yayıb.

Agentliyin xəbərinə görə, Si Cinpin danışıqların geniş və məhdud formatda aparıldığı Kremlin binasını tərk edib.

Rusiya və Çin liderləri arasında yüksək səviyyəli danışıqlar ümumilikdə yeddi saat davam edib.

Görüşün nəticəsi olaraq Moskva və Pekin qlobal strateji sabitlik üzrə Birgə Bəyanat imzalayıblar. Bəyanatda hər kəs üçün bərabər təhlükəsizlik təminatının vacibliyi vurğulanıb.

Mayın 8-də Kremlin binasında keçirilən danışıqlardan sonra imzalanan sənədlərlə bağlı Vladimir Putin bəyan edib ki, Rusiya ilə Çin arasında münasibətlər tarix boyu ən yüksək səviyyəyə çatıb. Onun sözlərinə görə, iki ölkəni birləşdirən qəhrəmanlıq dolu ortaq keçmiş və döyüş qardaşlığı gələcək inkişaf üçün möhkəm təməl yaradır.