Son zamanlar Ukrayna Rusiya ərazisinə, o cümlədən, paytaxt Moskvaya intensiv zərbələr endirir. Bu hücumla bağlı Ukrayna Müdafiə və Təhlükəsizlik Şurasının katibi Oliksiy Danilov bildirib ki,  ukraynalı uşaqlar, qadınlar və qocalar düşmən hücumlarına görə daim sığınacaqlarda yaşayırlar. Ukraynanın zərbələri ilə qarşı tərəf də Moskvada öz evlərində özlərini rahat hiss edə bilməsinlər.

Mövzu ilə bağlı Beynəlxalq Münasibətlər və Diplomatiya Araşdırmaları Mərkəzinin eksperti Kənan Novruzov İqtisadiyyat.az-a açıqlamasında qeyd edib ki, Rusiya-Ukrayna müharibəsi hələ bir müddət də davam edəcək:

"Təxminən 2 aydır ki, Rusiyanın Ukrayna ilə sərhəd olan ərazilərinə müxtəlif hücumlar olur. Eyni zamanda paytaxt Moskvaya da hücumlaırn edilməsi nəzərdən qaçmır. Rusiyaya olan bu hücumlar Ukraynanın əks-hücum əməliyyatının pik nöqtəsidir. Sözügedən hücumlar Ukraynanın xeyrinədir. Bu, onu göstərir ki, müharibə heç də Rusiyanın istədiyi kimi getmir. Müharibə başlayanda heç kim döyüşlərin Rusiya ərazisinə də keçəcəyini təxmin etmirdi. Fikrimcə, bu proses yaxın gələcəkdə daha da intensivləşəcək və döyüşlər daha ciddi formada davam edəcək. Gələcəkdə Rusiyanın sərhəd bölgələrində artilleriya döyüşləri də başlaya bilər. Nəticədə bu döyüş Rusiyada vətəndaş müharibəsinə səbəb ola bilər". 

Qeyd edək ki, Rusiya ilə Ukrayna arasında genişmiqyaslı müharibə ötən il fevralın 24-də başlayıb. Bu ilin iyununda Ukrayna əks-hücum əməliyyatlarına start verib.

Gülşən Şərif