Rusiya Mərkəzi Bankı sentyabrda keçiriləcək Direktorlar Şurasının iclasında əsas uçot dərəcəsinin artırılmasını istisna etmir.
İqtisadiyyat.az xəbər verir ki, bunu Rusiya Mərkəzi Bankının sədri Elvira Nabiullina cümə günü keçirdiyi mətbuat konfransında bildirib.
"Rusiya Bankının Direktorlar Şurasının avqustun 15-də keçirilən iclasında biz neytral siqnal verdik. Mahiyyət etibarı ilə bu, həm məzənnənin dəyişməz saxlanılması, həm də 2024-cü ildə 4% inflyasiya hədəfinə çatmaq üçün əsas uçot dərəcəsinin artırılması imkanları deməkdir", - Nabiullina qeyd edib.
Nabiullina əlavə edib ki, inflyasiya davamlı olaraq yavaşlayarsa, uçot dərəcəsinin aşağı salınması mümkün olacaq: "Son faiz artımı əvvəlki mərhələlərdə mövcud olan maliyyə sabitliyinə təsir edib. Ancaq maliyyə sabitliyi ilə bağlı risklər aradan qalxdıqdan sonra uçot dərəcəsini aşağı salmaq olar".
Qeyd edək ki, Rusiya Bankı daha əvvəl İdarə Heyətinin növbədənkənar iclasında əsas uçot dərəcəsini illik 8,5%-dən 12%-ə qaldırmaq qərarına gəlib.
"Rusiya Bankının İdarə Heyəti 15 avqust 2023-cü il tarixindən əsas uçot dərəcəsini 350 baza bəndi artıraraq illik 12%-ə çatdırmaq qərarına gəlib. Qərar qiymət sabitliyi risklərini məhdudlaşdırmağa yönəlib", - məlumatda deyilir.
Rusiya Bankının Direktorlar Şurasının əsas uçot dərəcəsi ilə bağlı növbəti iclası 2023-cü il sentyabrın 15-nə təyin edilib.
