"2024-cü ilin yanvar-may aylarında Rusiya ilə Azərbaycan arasında qarşılıqlı hesablaşmalarda milli valyutaların payı 70%-dən çox olub". 

İqtisadiyyat.az xəbər verir ki, bunu Rusiya Federasiyası Baş nazirinin müavini, Rusiya Federasiyası ilə Azərbaycan arasında iqtisadi əməkdaşlıq üzrə Hökumətlərarası Komissiyanın Rusiya tərəfinin sədri Aleksey Overçuk deyib.

"Qarşılıqlı ticarətdə biz milli valyutalarımıza güvənirik. Onların ikitərəfli hesablaşmalarda payı 2023-cü ilin sonunda 57,8%, 2024-cü ilin yanvar ayının sonunda 73,1% olub", - Overçuk qeyd edib. 

Hökumətlərarası komissiyanın növbəti iclası zamanı Rusiya Baş nazirinin müavini Azərbaycanda rus dilinin öyrənilməsinin dəstəklənməsinə yönələn tədbirlərə də diqqət çəkib: "Biz Azərbaycanın rus dilinə münasibətini yüksək qiymətləndiririk. Hazırda respublikada tədris prosesi rus dilində həyata keçirilən və ya onun öyrənilməsini nəzərdə tutan 600-dən çox məktəbəqədər təhsil müəssisəsi, 300-dən çox ümumi təhsil müəssisəsi var. 2023-cü ildə 140 min tələbə rus dilində tədris imkanı əldə edib". 

Bundan əlavə, Overçukun sözlərinə görə, tərəflər turizm sektorunda sənayenin rəqəmsallaşdırılmasından və turizm üçün lazım olan avadanlıqların istehsalının lokallaşdırılmasından tutmuş xizək və dəniz kurortlarının, təbii marşrutların inkişafına qədər bütün sahələrdə işə başlayıblar.