Üç mindən çox yük maşını Rusiya-Gürcüstan sərhədindən Şimali Osetiyanın Rusiya tərəfindəki Verxniy Lars keçid məntəqəsində keçmək üçün gözləyir.

İqtisadiyyat.az Rusiya mediasına istinadən xəbər verir ki, bu barədə ölkənin Yol Hərəkətinin Təşkili Mərkəzi məlumat yayıb.

Belə ki, çərşənbə axşamı səhər saatlarına olan məlumata görə, gediş-gəliş üçün elektron növbəyə ümumilikdə 3196 ağır yük avtomobili qeydə alınıb.

Şimali Osetiya rəhbəri Sergey Menyaylonun daha əvvəl verdiyi məlumata görə, tranzit avtomobillərin dövlət sərhədində toplanması ilə əlaqədar respublikada yüksək hazırlıq rejimi tətbiq edilib. Onun bir hissəsi olaraq, dayanacaqlar mövcud olana qədər yük maşınlarının bölgəyə girişi məhdudlaşdırılır.

Gürcüstan hərbi yolu yüksək dağlıq ərazilərdən keçir və hazırda Rusiyanı Gürcüstan və Ermənistanla birləşdirən yeganə quru yoludur.

 

Sadiq Cavadov