Rusiya hakimiyyəti gübrələrin ixracı üçün vahid ticarət şirkətinin yaradılmasını nəzərdən keçirir.

Bu barədə İqtisadiyyat.az "Bloomberg"ə istinadən xəbər verir.

Məlumata görə, bu ideya rusiyalı iş adamı Dmitri Mazepin tərəfindən irəli sürülüb. Belə bir şirkətin yaradılması təşəbbüsü Sənaye və Ticarət naziri Denis Manturov və Baş nazir Mixail Mişustin arasında müzakirə olunub. Lakin qərar hələ qəbul edilməyib. Rəsmi səviyyədə növbəti müzakirənin nə vaxt planlaşdırıldığı məlum deyil.

Bildirilib ki, Rusiyanın bəzi iri gübrə istehsalçıları vahid şirkətin yaradılmasının onların biznesinə zərər verəcəyindən ehtiyat edirlər. Buna baxmayaraq, vahid ticarət şirkəti Rusiyaya ixrac gəlirlərinə nəzarət etməyə imkan verəcək, həm də dünyada qiymətlərə təsir göstərəcək.

Əlavə edək ki, qlobal gübrə istehlakının təxminən 15%-i Rusiyanın payına düşür. Rusiya gübrə istehsalçıları bu ilin yanvar-iyul ayları ərzində hasilatı 3% artırıblar, bu da qismən daxili bazarda artan tələblə bağlıdır.

 

Gözəl Həşimova