Sentyabrın 1-nə təyin edilmiş Azərbaycan Respublikasının Milli Məclisinə növbədənkənar seçkilərdə 49 saylı Abşeron ikinci seçki dairəsindən deputatlığa namizəd olan Rizvan Nəbiyevin təşviqat kampaniyası davam edir.

İqtisadiyyat.az xəbər verir ki, bitərəf namizəd olan Rizvan Nəbiyev seçicilərinə müraciət edib.

O, qalib dövlətimizin parlamentində təmsil olunmaq, parlament diplomatiyasına töhfə vermək niyyəti ilə Milli Məclisə növbədənkənar seçkilərdə iştirak etməyə qərar verdiyini söyləyib.

Namizəd bildirib ki, təşviqat kampaniyası çərçivəsində seçiciləri arasından ilk xeyir-duanı qazilərdən və şəhid ailəsi üzvlərindən alıb.

O, avqustun 9-da Masazırdan olan Vətən müharibəsi şəhidimiz Cavid Həsənovun böyüyüb boya-başa çatdığı ata ocağını ziyarət edib: "İlk xeyir-duanı da məhz onun atası Birinci Qarabağ müharibəsi qazisi Mikayıl kişidən və anası Mirvari xaladan, Vətən Müharibəsi Qəhrəmanı, şəhidimiz Vüqar Ağayevin anası Xanım xaladan, digər şəhidlərimiz hərbi həkim Turqut Xəlilbəylinin atası Birinci Qarabağ müharibəsinin iştirakçısı Nadir kişidən, Röyal Ələkbərovun atası Fərmayıl kişidən və Azər Mikayılovun həyat yoldaşı Təhminə xanımdan almağım mənim üçün böyük şərəf oldu".

Qeyd edək ki, R.Nəbiyev 1975-ci ildə Göyçə mahalının Basarkeçər rayonunun Qanlı kəndində anadan olub. Yeddinci sinifə qədər Qanlı kənd orta məktəbində təhsil alıb. Daha sonra Ermənistandan azərbaycanlıların qovulması səbəbindən təhsilini Bakı şəhərində davam etdirib.

BDU-da Beynəlxalq münasibətlər üzrə mütəxəssis bakalavr (1997) və Almaniyanın Saarbrüken Universitetində Avropa hüququ üzrə magistr təhsili – LL.M. (1999) alıb. Berlin Azad Universitetində Siyasi elmlər doktoru (Dr.rer.pol) elmi dərəcəsinə yiyələnib (2003). Müstəqilliyimiz tarixində Almaniyada humanitar elmlər sahəsində müdafiə edən ilk azərbaycanlı alim olub. Xəzər hövzəsində enerji siyasəti və geosiyasi maraqlar mövsuzunda kitabı alman dilində nəşr edilib (Berlin, 2004). Dünyanın 100 ən yaxşı universiteti sırasında olan Berlin Azad Universitetində dərs deyib.

Ermənistanın Azərbaycana qarşı ərazi iddialarına dair alman və ingilis dillərində 15 kitabın yazılması və nəşrini təmin edib. Alman və ingilis dillərində nəşr olunmuş “Şuşanın irsi” elmi monoqrafiyasının həmmüəllifidir (Berlin, 2022-2023).

R.Nəbiyev 20 ildən artıqdır diplomatik fəaliyyətdədir, Azərbaycanın Almaniyadakı Səfirliyində və Xarici İşlər Nazirliyində müxtəlif məsul vəzifələrdə çalışıb. 2022-ci ildən Xarici İşlər Nazirliyində İdarə rəisidir. 80-dən artıq dövlətlə beynəlxalq müqavilələrin və digər sənədlərin razılaşdırılması və imzalanmasına töhfə verib. Ölkəmizin təqdimatına həsr edilmiş “2008 - Almaniyada Azərbaycan İli”nin Səfirlik üzrə Əlaqələndiricisi olub. Səmərəli fəaliyyəti ilə əlaqədar olaraq “Dövlət qulluğunda fərqlənməyə görə” medalı ilə təltif edilib və bir sıra digər təltiflərə layiq görülüb.

Ailəlidir, iki övladı var.