Sentyabrın 1-nə təyin edilmiş Azərbaycan Respublikasının Milli Məclisinə növbədənkənar seçkilərdə 49 saylı Abşeron ikinci seçki dairəsindən deputatlığa bitərəf namizəd olan Rizvan Nəbiyevin seçkiqabağı təşviqat çərçivəsində Abşeron rayonunda seçicilərlə növbəti görüşü keçirilib.
Deputatlığa namizəd Seçki Platformasında yer alan müxtəlif məsələlər, o cümlədən rayonun dayanıqlı və təmiz inkişafına yönəlmiş hədəflər barədə çıxış edib.
Görüşdə ictimaiyyət nümayəndələri ilə yanaşı gənclər və idmançılar, eləcə də idmansevərlər iştirak ediblər.
R.Nəbiyev tədbirdə dövlət tərəfindən Azərbaycanda idmanın inkişafına ayrılan diqqət və qayğıdan, idmançılarımızın Paris Olimpiadasındakı uğurlarından danışıb.
Deputatlığa namizəd ölkəmizə daima qələbə sevincini yaşadan idmançılarımıza, təhsil və elm sahəsində yeni-yeni uğurlara imza atan gənclərimizə bir daha müvəffəqiyyətlər arzulayıb.
R.Nəbiyev çıxışında gənclərin daha yüksək təhsilə yiyələnməsi ilə bağlı Seçki Platformasında hədəf götürdüyü məsələlərdən də danışıb. Namizədin bu barədə çıxışı gənclərin təhsili sahəsində beynəlxalq əməkdaşlığın genişləndirilməsi, xaricdə təhsil məqsədi ilə təqaüd imkanlarının təşviqi, xarici dil biliklərinin artırılması və s. mövzuları əhatə edib.
O, qaçqınlıqdan diplomatiyadək keçdiyi həyat yolunda təhsilin oynadığı rolu xüsusi vurğulayıb.
Deputatlığa namizəd eyni zamanda gənclərin asudə vaxtlarını sağlam və səmərəli keçirməsi üçün müxtəlif məkanların (məsələn futbol meydançaları və s.) yaradılmasına nail olunmasının da önəminə toxunub.
Səmimi mühitdə keçirilən görüşün sonunda deputatlığa namizəd seçiciləri dinləyib, onların təklif və müraciətləri əsasında fikir mübadiləsi aparılıb.
Növbədənkənar parlament seçkilərində aktiv iştirak edəcəklərini söyləyən seçicilər Rizvan Nəbiyevə səs verəcəklərini bildiriblər.