“Qurban ətini pulla satmaq böyük haram və günahdır. İslam aləmində belə şey yoxdur. Belə qondarma şeylər bizdə olur. Bu çox ağır bir məsələdir, İslam dininə qarşı bir təhqirdir. Qurban ətini satmaq da, almaq da günahdır. Bunu alan adam da bilməldir ki, onu satan dələduzdur, yalançıdır”.

Bu sözləri İqtisadiyyat.az-a açıqlamasında ilahiyyatçı Tural İrfan deyib.

O, imkanı olan şəxsləri qurban kəsib paylamağa çağırıb və qurban ətinin pulla satılmasının düzgün olmadığını söyləyib: “Qurban insanın Allaha yaxınlığını, yəni öz malından, varından Allah yolunda keçməyə hazır olduğunu göstərir. Qurban kəsilən heyvanın bir hissəsini kəsən insanın öz ailəsi götürməlidir, bir hissəni qohumları və qonşuları, üçüncü hissəsini isə kasıblara, imkansız insanlara verilməlidir”.   

Xatırladaq ki, bu il Qurban bayramı ilə əlaqədar 4 gün ardıcıl qeyri-iş günü olacaq. Belə ki, Nazirlər Kabinetinin qərarına əsasən iyunun 6 və 7-si Qurban bayramı günləri müəyyən edilib. Bu il 7 iyun şənbə gününə təsadüf etdiyi üçün Əmək Məcəlləsinə uyğun olaraq, 9 iyun qeyri-iş günü olacaq. Beləliklə, 8 iyun bazar gününə təsadüf etdiyi üçün Qurban bayramında ardıcıl 4 gün – 6, 7, 8 və 9 iyun tarixləri qeyri-iş günləri olacaq.