İqtisadiyyat.az xəbər verir ki, bu barədə Qaz İxrac Edən Ölkələr Forumunun (GECF) 2025-ci il Qaz Bazarı Hesabatında deyilir.
Məlumata əsasən, qlobal təbii qaz istehlakı 2,5 faiz artaraq 4 trilyon 170 milyard kubmetrə çatıb.
Son 10 ilin ən sürətli artım templərindən biri kimi qeydə alınan bu artıma iqtisadi artım, sənayeləşmə, texnoloji inkişaflar, əhali artımı, urbanizasiya və dəyişən hava şəraiti səbəb olub.
Asiya Sakit Okean regionu qlobal qaz istehlakının artmasına səbəb olub. Qlobal tələb artımının 60 faizi regionun payına düşür. O cümlədən, ötən il Çinin istehlakı 33 milyard kubmetr artaraq 430 milyard kubmetrə çatıb. Rusiya və ABŞ-nin hər biri istehlaka 20 milyard kubmetr töhfə verib. Latın Amerikası, Karib hövzəsi və Afrikada artım məhdud olub.
Elektrikli nəqliyyatın yayılması, sənayenin elektrikləşdirilməsi və məlumat mərkəzlərinin böyüməsi ilə qazla işləyən elektrik enerjisi istehsalı artıb.
2024-cü ildə qlobal neft və qaz kəşfiyyatı və hasilat investisiyaları 625 milyard dollara çatıb. Bu rəqəm pandemiyadan sonrakı ikinci ən yüksək səviyyə kimi qeydə alınıb.
Həmin il ümumilikdə 130 yeni qaz layihəsi istifadəyə verilib. Bu layihələrin ümumi illik istehsal gücünün 60 milyard kubmetrə çatacağı gözlənilir.
Gözəl Azadəliyeva
