Qlobal neft tədarükü 2024-cü ilin yanvarında gündəlik 1,4 milyon barel kəskin azalaraq 101,45 milyon barel təşkil edib.
İqtisadiyyat.az xəbər verir ki, bu barədə Beynəlxalq Enerji Agentliyinin (IEA) analitiklərinin statistik məlumatlarında deyilir.
Qlobal tədarükün azalmasına əlverişsiz hava şəraitinin də təsir etdiyi qeyd edilir. Belə ki, Şimali Amerikada kəskin soyuqlar səbəbindən neft hasilatında fasilələr qeydə alınıb. Nəticədə yanvarda ABŞ-də orta gündəlik hasilat 540 min barel, Kanadada isə 360 min barel azalıb.
Bundan əlavə, qlobal xammal tədarükünün kəskin azalmasına OPEC+ sazişində iştirak edən bir sıra ölkələrdə yeni hasilatın azaldılması barədə qərarların qüvvəyə minməsi də təsir edib. Agentlik bu qənaətə gəlib ki, bu, qlobal tədarük strukturunda gündə təxminən 300 min barel itkiyə səbəb olub.
Qlobal tədarükün azalmasına səbəb olan digər amil Qırmızı dənizdə geosiyasi gərginliyin artması göstərilib.
