İqtisadiyyat.az xəbər verir ki, bu barədə RİA Novosti-yə Qətərin Baş Naziri və Xarici İşlər Naziri Məhəmməd bin Əbdürrəhman Al Tani bildirib.

“Qətər, Misir və ABŞ-dən olan vasitəçilər Qəzza zolağında münaqişə tərəfləri arasında atəşkəsə dair razılaşma əldə etməyə müvəffəq olub. Bu razılaşma 19 yanvarda qüvvəyə minəcək. İlk mərhələdə 33 israilli girov, o cümlədən mülki şəxslər və qadın hərbçilər azad ediləcək. Bunun qarşılığında İsrail həbsxanalarından və həbs mərkəzlərindən fələstinli məhbuslar azad olunacaq”,-deyə Al Tani bildirib.

O əlavə edib ki, Qəzza zolağında atəşkəsin ilkin mərhələsi 42 gün davam edəcək və bu müddət ərzində İsrail 8 oktyabr 2023-cü il tarixindən sonra saxlanılan fələstinliləri azad etməlidir.

Bundan əvvəl HƏMAS rəsmi bəyanatında Qəzza zolağında atəşkəsin əldə edildiyini təsdiqləyərək, bu razılaşmanın əldə edilməsində vasitəçi roluna görə Qətər və Misirə təşəkkür edib.