İngiltərənin paytaxtı Londonda bir supermarketdə qəhvə qiymətlərinin qalxmasından sonra artan oğurluq hallarına qarşı maraqlı bir üsul seçilib. Bu barədə İqtisadiyyat.az xarici mediaya istinadən xəbər verir. Ölkədə inflyasiya səbəbi ilə bir çox sahələrdə, o cümlədən qida bazarında qiymət artımı müşahidə olunur. Qiymətləri bahalaşan məhsullar sırasında qəhvə də var. İngiltərə Milli Statistika İdarəsinin rəsmi məlumatına görə, qablaşdırılmış qəhvələr keçən ilin eyni dövrü ilə müqayisədə 13 % bahalaşıb. Bu isə bəzi fürsətcilləri oğurluğa sövq edir. Market idarəçiləri isə bu kimi hallara qarşı ehtiyat tədbirlərini gücləndirib. 

Supermarketlərdən birində çəkilən bu foto sosial mediada maraqla qarşılanıb. Belə ki, market rəhbərliyinin qərarı ilə satış rəflərinə saxta qəhvə qabları qoyulub. Qabların üzərinə isə “Bu bir maketdir, satış üçün nəzərdə tutulmayıb. Xahiş edirik, personaldan yardım istəyin” sözləri yazılmış kağız parçası yapışdırılıb. Marketlərin mümkün qəhvə oğurluğuna qarşı belə bir addım atdıqları bildirilir.