Rusiyanın enerji şirkəti “Qazprom”un səhmləri 2009-cu ildən bəri ən aşağı səviyyəyə düşüb.

İqtisadiyyat.az xəbər verir ki, bunu Moskva Birjasının məlumatları göstərib. 

Birja məlumatlarına əsasən, şirkətin bir səhminin qiyməti 2,41% azalaraq 106,1 rubl təşkil edib. Sonuncu dəfə belə bir vəziyyət təxminən 16 il əvvəl – 2009-cu ilin yanvar ayında müşahidə olunmuşdu.

Dekabrın 4-də “Qazprom”un səhmləri enişini sürətləndirib. Belə ki, şirkətin qiymətli kağızlarının dəyəri 115,5 rubl olub ki, bu da əvvəlki bağlanış səviyyəsindən 4,92% aşağıdır.

Şirkətin səhmlərinin azalması Rusiyanın maliyyə naziri Anton Siluanovun bəyanatı fonunda baş verib. O bildirib ki, nazirlik 2025-ci il büdcəsinə “Qazprom”dan divident gəlirlərini daxil etməyib. Onun sözlərinə görə, nazirliyin ümumi yanaşması ondan ibarətdir ki, dövlət şirkətləri mənfəətlərinin 50%-ni divident kimi ödəməlidirlər.

Bundan əvvəl Avstriya şirkəti “Qazprom” ilə müqaviləni ləğv etmişdi.