Qazaxıstanda irimiqyaslı daşqınlarla bağlı vəziyyətlə əlaqədar 80 təhsil müəssisəsi distant rejimdə işləyir. 

İqtisadiyyat.az xəbər verir ki, bu barədə ölkənin Təhsil Nazirliyinin rəsmi nümayəndəsi Mereke Amangeldikızı keçirdiyi brifinqdə məlumat verib.

"Əməliyyat məlumatlarına görə, bu gün 80 təhsil müəssisəsi distant formatda təhsili davam etdirir, o cümlədən müvəqqəti yerləşdirmə mərkəzi kimi təyin olunmuş 55 məktəb. Onlarda 7255 evakuasiya edilmiş uşaq var", - rəsmi nümayəndə qeyd edib.

Onun sözlərinə görə, müvəqqəti yerləşdirmə mərkəzlərində 300-dən çox pedaqoji psixoloq uşaqlara və xəsarət almış vətəndaşlara yardım göstərir. Uşaq hüquqları üzrə rayon müvəkkillərinin fəal işi təşkil olunub: "Uşaqlar lazımi məktəb ləvazimatları, distant təhsil üçün texniki vasitələr, yemək və geyimlə təmin olunurlar. İnternetin sürəti aşağı olan kənd məktəblərində Starlink şəbəkəsinə qoşulma məsələsi araşdırılır".

Nazirliyin rəsmi nümayəndəsi onu da qeyd edib ki, 20 minə yaxın təhsil işçisi daşqınlara qarşı mübarizə tədbirlərində könüllü kimi iştirak edir.

Qeyd edək ki, mart ayında başlayan daşqınlar səbəbindən Qazaxıstanın on rayonunda yerli fövqəladə vəziyyət elan edilib. Daşqın dövrünün əvvəlindən 72 mindən çox insan, o cümlədən 16 mindən çox uşaq xilas edilib. 3686 fərdi yaşayış binası, 557 həyətyanı sahə və 1822 bağ evi su altında qalıb. Xilasetmə əməliyyatlarına ümumilikdə 12,4 mindən çox insan, 1,3 min texnika və 7 təyyarə cəlb olunub.