Qarabağ və Şərqi Zəngəzura əhalinin geri qayıdışı ilə əlaqədar olaraq ərazilərdə dayanıqlı icmaların yaradılması və onların yeni yaşayış şəraitinə adaptasiya olunması üçün reinteqrasiya tədbirləri təşkil olunacaq.

İqtisadiyyat.az xəbər verir ki, Məcburi Köçkünlərin Sosial İnkişaf Fondu bununla bağlı hazırlıqlara başlayıb.

Hədəf ərazilərdə Böyük Qayıdışa dair I Dövlət proqramı haqqında məcburi köçkünlər arasında müxtəlif alət və metodologiyalardan istifadə etməklə məlumatlandırma tədbirləri keçiriləcək.

Nəzərdə tutulan hədəf ərazilərdə məcburi köçkün icmaları və fərdi benefisiarlar üçün reinteqrasiya tədbirlərinin təşviqi ilə bağlı seminarlar təşkil olunacaq. Seminarlarda dövlət qurumlarının, donor təşkilatın, QHT nümayəndələrinin, formalaşdırlacaq icma fəaliyyət qruplarının və fərdi benefisiarların iştirakı nəzərdə tutulur.

Eyni zamanda, məcburi köçkün icmalarda səfərbərlik təlimləri təşkil ediləcək. "Aktivlər üzrə icma inkişafı və Kənd yerlərinin birgə qiymətləndirilməsi" yanaşmaları tətbiq olunmaqla bacarıqlar artırılacaq.

İcma iştirakçılığı və gender mövzusunda seminarların təşkili planlaşdırılır. Bununla icmalar tərəfindən seçilmiş İcma Fəaliyyət Qruplarının gender balansı nəzərə alınmaqla formalaşdırılması, strukturun yaradılması və fəaliyyətlərin icrasında qadınların iştirakçılığının artırılması nəzərdə tutulub. 

Dayanıqlı və mütəşəkkil icmaların yaradılması, idarə olunması, icmadaxili fəaliyyətin təşkili istiqamətində bacarıqların artırılması üçün təlimlər keçiriləcək. Benefisiarların təsdiq olunmuş ixtisaslar üzrə peşə təhsilinə cəlb ediləcək.

Fond tədbirlərin təşkilatçılığını Azərbaycan İcma İnkişafı üzrə Araşdırmalar, Təlim və Resurs Mərkəzi İctimai Briliyinə həvalə edib və təşkilatla 1,8 milyon manat dəyərində müqavilə bağlanıb.