“Modenco” MMC statistik məlumatların verilməsi qaydalarını pozduğuna görə cərimələnib.

İqtisadiyyat.az-ın əldə etdiyi məlumata görə, müvafiq qurum tərəfindən şirkət barəsində İnzibati Xətalar Məcəlləsinin 389-cü (Statistik məlumatların verilməsi qaydalarının pozulması) maddəsinə əsasən cərimə protokolu tərtib edilib.

Daha sonra protokol baxılması üçün Nərimanov Rayon Məhkəməsinə göndərilib. Məhkəmədə barəsində protokol tətbiq edilmiş MMC ilə bağlı müraciətə baxılıb.

Hakim Gültəkin Əsədovanın  sədrliyi ilə keçirilən prosesdə qərar elan olunub. Qərara əsasən, şirkətə inzibati tənbeh tətbiq edilib, yəni cərimə kəsilib.

Xatırladaq ki, statistik məlumatların verilməsi qaydalarının pozulmasına görə 300 manatdan 500 manatadək məbləğdə cərimə edilir.

Qeyd edək ki, “Modenco” MMC-nin adı mətbuatda qalmaqalla yadda qalıb. Belə ki, iki il əvvəl Təhsil Nazirliyinin Astaranın Şəvqo, Xiçəsu və Lerik rayonunun Loda kəndində tikilən modul tipli məktəblərin inşası ilə bağlı elan etdiyi tenderin qalibi olan “Modenco” işlərə başqa bir şirkəti də cəlb edib. Lakin sonradan həmin şirkətlə aralarında pul məsələsinə görə qalmaqal yaranıb və iş məhkəməyə qədər gedib çıxıb.