Rusiya prezidenti Vladimir Putin KXDR-in dövlət məsələləri üzrə sədri Kim Çen Inın dəvəti ilə iyunun 18-19-da Koreya Xalq Demokratik Respublikasında (KXDR) dostluq səfərində olacaq.
İqtisadiyyat.az xəbər verir ki, bu barədə Kremlin mətbuat xidməti məlumat yayıb.
Bundan əlavə, iyunun 19-20-də Vyetnam Kommunist Partiyası Mərkəzi Komitəsinin baş katibi Nquyen Phu Çonqun dəvəti ilə Rusiya prezidenti Vyetnama dövlət səfərinə gedəcək.
Hanoyda Vyetnam Kommunist Partiyası Mərkəzi Komitəsinin baş katibi Nquyen Phu Çonq, prezident Tho Lam, baş nazir Fam Min Tin və Milli Assambleyanın sədri Çan Than Man ilə görüşlər keçiriləcək.
Görüşdə Rusiya ilə Vyetnam arasında ticarət-iqtisadi, elmi, texnoloji və humanitar sahələrdə hərtərəfli strateji tərəfdaşlığın vəziyyəti və gələcək inkişaf perspektivlərinin müzakirəsi, həmçinin beynəlxalq və regional gündəliyin aktual məsələləri üzrə fikir mübadiləsinin aparılması planlaşdırılır.
Danışıqların yekunu olaraq, birgə bəyanat qəbul olunacaq və bir sıra ikitərəfli sazişlər imzalanacaq.
