"Qərb Ukraynaya hərbi dəstək verir. Onlar ukraynalıların əli ilə öz problemlərini həll edirlər. Bu, əsrlər boyu həmişə belə olub, indi də belədir. Ukrayna bizə düşmən deyil. Rusiyanı məhv etmək və strateji cəhətdən məğlub etmək istəyənlər Qərbdədir".
İqtisadiyyat.az xəbər verir ki, bunu Rusiya prezidenti Vladimir Putin müharibədə yaralanan əsgərlərin müalicə olunduğu Vişnevski adına Mərkəzi Hərbi Kliniki Hospitala ziyarəti zamanı deyib.
Mövcud problemləri Qərbin yaratdığını və Ukrayna üzərindən Rusiya ilə döyüşdüyünü vurğulayan Putin bildirib: "Əsrlər boyu Rusiyanı məhv etməyi hədəfləsələr də, biz onları daha tez məhv edəcəyik. Problemin mahiyyəti Ukrayna deyil, Rusiyanı Ukraynanın əli ilə məhv etməyə çalışanlardır. Amma onlar qətiliklə bunu edə bilməyəcəklər".
"Biz əbədi döyüşmək fikrində deyilik, lakin mövqelərimizi də təslim etmək fikrində deyilik", - Rusiya lideri əlavə edib.
