2024-cü ilin ikinci rübündə Almaniyanın idman malları istehsalçısı “Puma” gəlirini 2023-cü il səviyyəsində saxlamaqla xalis mənfəətini dörddə bir miqdarında azaldıb.

İqtisadiyyat.az xarici mediaya istinadən xəbər verir ki, şirkətin aprel-iyun aylarında xalis mənfəəti bir il əvvəlki 55 milyon avrodan 41,9 milyon avroya düşüb, gəliri isə faktiki olaraq dəyişməz qalıb və 2,12 milyard avro təşkil edib.

Məlumata görə, “Puma”nın ümumi marjası 44,8%-dən 46,8%-ə yüksəlib.

Şirkətin ikinci rübdə Şimali Amerikada satışları 9%, Asiya-Sakit okean regionunda 1,9% artıb. Avropa, Yaxın Şərq və Afrikada isə 4,3% azalıb. “Puma”nın ayaqqabı seqmentində qlobal satışları faktiki olaraq dəyişməz qalıb və 1,1 milyard avro təşkil edib. Şirkətin geyim satışı 9,2% artaraq 705,6 milyon avroya, aksesuar satışları isə 4,7% azalaraq 314,8 milyon avroya düşüb.

2024-cü ilin əvvəlindən “Puma”nın kapitallaşması 28,6% azalaraq 6,2 milyard avroya düşüb.

 

Sadiq Cavadov