Daha çox mənfəət əldə etmək üçün investorlar pul vəsaitlərini müxtəlif aktivlərə yatırır. Adətən, qızıl, dollar və ya daşınmaz əmlaka arasında seçim etməli olurlar. Mütəxəssislər qeyd edir ki, hər seçimin öz mümkün riskləri var. Buna görə də onlar yatırımdan öncə bu istiqamətdə ciddi araşdırma aparmalı, bu işin bilicilərindən yardım almalıdırlar. Bəs görəsən yatırım etmək üçün hansı aktiv daha təhlükəsiz hesab olunur?
Mövzu ilə bağlı İqtisadiyyat.az-a açıqlama verən iqtisadçı Eldəniz Əmirov deyib ki, investorlar qeyri-müəyyənlik vəziyyətində daha çox yığıma üstünlük verirlər: “Yığım vasitəsi kimi isə qızıl əsas aktiv olaraq çıxış edir. Nəticədə qızılın kifayət qədər bahalaşmasının səbəbini biz bununla izah edə bilərik. Düşünürəm ki, 2025-ci ildə bir fərqli yanaşma mümkün ola bilər”..
İqtisadçı vurğulayıb ki, investisiya edənlərin qızıla, yoxsa dollara yatırım etməsi məsələsi investisiyanın ən primitiv formasıdır: “Bütün hallarda əsas sual zaman məsələsidir. Yəni investisiya edilən vəsaitin hansı müddətə edildiyi və miqdarı vacib məsələdir. Bu sualı vəsaitin müddəti və həcmindən asılı olaraq cavablandırmaq olar. Əgər söhbət böyük məbləğdən və uzunmüddətli investisiyadan gedirsə, qızıl və ya dollar arasında daha az riskə malik olanını seçmək olar. Lakin söhbət kiçik məbləğdən gedirsə, o zaman bu investisiyanın qısamüddətli dövr ərzində effektivliyi çox az olur”.
Mütəxəssis əlavə edib ki, belə vəziyyətlərdə daşınmaz əmlak bazarı hər zaman özünü doğruldur: “Hesab edirəm ki, bu gün daşınmaz əmlak bazarı risklərin ən aşağı olduğu bir investisiya fəaliyyəti istiqaməti olaraq qalmaqdadır”.
İsmayıl Bakuvi