Portuqaliya hökuməti prezidentin bəyanatına baxmayaraq, müstəmləkə keçmişinə və köləliyinə görə təzminat ödəmək prosesini başlatmaqdan imtina edib. 

İqtisadiyyat.az xəbər verir ki, bu barədə "Reuters" məlumat yayıb. 

Agentliyin məlumatına görə, kompensasiyaların ödənilməsi ilə bağlı konkret fəaliyyət proqramı yoxdur. Hökumətin münasibətləri dərinləşdirmək, tarixi həqiqətlərə hörmət etmək və qardaş xalqların barışığı əsasında getdikcə daha sıx əməkdaşlıq etmək istədiyi vurğulanıb.

Həmçinin qeyd edilir ki, baş nazir keçmiş müstəmləkələrlə əlaqələri "əla" adlandırıb və təhsil, dil, mədəniyyət, səhiyyə və iqtisadiyyat sahələrində əməkdaşlığı xatırladıb.

Afrika xalqlarının müstəmləkəçilikdən kütləvi şəkildə azad edilməsi prosesi ötən əsrin 60-cı illərində başlanmışdır. Portuqaliyanın müstəmləkə imperiyası müxtəlif dövrlərdə Anqola, Braziliya, Şərqi Timor, Cape Verde və Mozambik, habelə Hindistanın müəyyən hissələrini əhatə edirdi.