Polşanın Rusiyadakı müvəqqəti işlər vəkili Yacek Şlyadevski Rusiya Xarici İşlər Nazirliyinə çağırılıb.
İqtisadiyyat.az xəbər verir ki, bu barədə Rusiya Xarici İşlər Nazirliyinin rəsmi saytında məlumat dərc olunub.
Şlyadevskiyə Varşavada hərbi qəbiristanlıqda baş vermiş insidentlə bağlı etiraz notası təqdim edilib.
“Polşa diplomatına həmçinin bildirilib ki, Varşava tərəfindən törədilən cilovsuz anti-Rusiya orgiyası qonşu dövlətlər arasında ünsiyyət prinsiplərindən kənara çıxıb. Buna çoxlu nümunələr var. Biz bu təzahürləri sadəcə qeyd etməyəcəyik, ona görə də adekvat cavab tədbirləri çox gözləməyəcək. Rusiya tərəfi, əlbəttə ki, qarşılıqlı hərəkətlərin vaxtını və xarakterini seçmək hüququnu özündə saxlayır”, - deyə məlumatda qeyd olunub.
Qeyd edək ki, dünən Varşavada xatirə qəbiristanlığında toplaşan etirazçılar Rusiyanın Polşadakı səfiri Sergey Andreyev və digər diplomatların yolunu kəsərək onların əklil qoymalarına mane olub.
