Polşalı deputat və Yerli Bağbanlar Assosiasiyasının prezidenti Miroslav Malişevski məhsul yığımında işçi çatışmazlığı ilə qarşılaşdıqlarını bildirib: “Lazımi qədər işçi yoxdur. Xüsusən də yük maşını, traktor sürmək, gübrə səpmək kimi daha çox fiziki işlərin öhdəsindən gələ biləcək kişi işçilərin sayı qaneedici deyil". Onun sözlərinə görə, bir çox fermerlər yığılıb qalan giləmeyvələrin işçi çatışmazlığından dolayı çürüməsindən, alıcılar isə inflyasiyadan şikayətlənirlər. Deputat təklif də irəli sürüb: "Düşünürəm ki, indiki məqamda özbək işçilərini daha çox Polşaya cəlb etmək imkanını nəzərdən keçirməliyik. Dörd milyondan çox özbək Rusiyadakı böhran səbəbindən vətənlərinə qayıtdı və indi onlar işsizdirlər və Polşaya gəlməyə hazırdırlar”. 

Qeyd edək ki, 2022-ci il ərzində təkcə müsəlman ölkələrindən ümumilikdə 136 min nəfərə Polşada işləmək üçün "iş icazəsi" verilib. Azərbaycandan 7769 nəfər bu icazəni alaraq Polşada işləyir. Ən çox iş icazəsi alaraq Polşada işləyən əcnəbilər özbəklər və türkiyəlilərdir.