"Bu il 10 bölgədə keçirilən "Peşələr Festivalı"nda, ümumilikdə, 50 mindən çox insan iştirak edib".

Bu sözləri İqtisadiyyat.az-a açıqlamasında "Peşələr festivalı"nın təşkilatçı şirkəti olan "ADMEDIA" reklam agentliyinin direktoru Sabit Məmmədov deyib.

Onun sözlərinə görə, tədbirin keçirilməsində əsas məqsəd həm maarifləndirmə, həm də gəncləri peşə seçiminə cəlb etməkdir: "Ölkəmizdə ikinci dəfə keçirilən "Peşələr Festivalı"nda təşkilatçı komanda Əmək və Əhalinin Sosial Müdafiəsi Nazirliyi yanında Dövlət Məşğulluq Agentliyinin sifarişi ilə "ADMEDIA" şirkətidir".

S.Məmmədov "Peşələr festivalı"nın hazırda Dənizkənarı Milli Parkda davam etdirilən yekun tədbirindən də danışıb. O bildirib ki, hazırda davam edən Festivala 8 mindən çox insan qatılıb: "Maarifləndirmə istiqamətində keçirilən Festival gəncləri peşə seçiminə cəlb etmək məqsədi daşıyır. 14 peşə sahibləri öz bilik və bacarıqlarını gənclərlə bölüşür və peşələri sevdirməyə çalışırlar. Buraya müxtəlif peşələr daxildir. Məsələn, data analitika, robototexnika, bərbər, dərzi və s".

O, həmçinin Dövlət Məşğulluq Agentliyinin rəsmi məlumatlarına əsasən, Peşələr Festivalının növbəti ildə də davam etdiriləcəyini söyləyib. Qeyd edib ki, Peşələr Festivalı gələn il digər şəhər və rayonlar üzrə davam etdiriləcək.

Sadiq Cavadov