Pakistan və İran Qvadar limanından İran sərhədinə qədər qaz kəmərinin ilkin 80 kilometrlik Pakistan hissəsinin tikintisi üzrə planları yekunlaşdırmaq niyyətindədir.

Bu barədə İqtisadiyyat.az "The News International" qəzetinə istinadən xəbər verir.

Pakistan rəsmilərinin sözlərinə görə, İslamabadın 18 milyard dollarlıq cərimədən yayınmaq üçün boru kəmərinin bu 80 kilometrlik hissəsini tikməkdən başqa seçimi yoxdur. Bildirilib ki, bu layihə İran prezidenti İbrahim Rəisinin aprelin sonunda Pakistana gözlənilən səfəri zamanı razılaşdırıla bilər.

Qeyd edək ki, Pakistanın "Interstate Gas Systems" şirkəti ilə İran Qaz Şirkəti "Mir" qaz kəmərinin tikintisinə dair sazişi hələ 2009-cu ildə imzalayıb. Pakistan yerüstü keçidin öz hissəsini 2015-ci ilin yanvarına kimi tikməyi öhdəsinə götürüb, lakin onun tikintisi başa çatmayıb, İran ilə sərhədə qədər olan hissə isə artıq istismara hazırdır.

2023-cü ilin avqustunda İslamabad Tehrana fors-major hallar barədə bildiriş göndərib və Vaşinqtondan boru kəmərini tamamlamaq üçün icazə alana qədər enerji layihəsi üzrə öhdəliklərini dayandırıb. Buna cavab olaraq Tehran layihə üzrə öhdəlikləri yerinə yetirmədiyinə görə İslamabadı 18 milyard dollarlıq cərimə ilə beynəlxalq arbitraj məhkəməsinə müraciət edəcəyi ilə hədələyib.

Daha sonra fevralın 27-də Pakistan qaz kəmərinin öz hissəsinin tikintisini bir il ərzində başa çatdırmaq qərarına gəlib.

Gözəl Həşimova