Rusiya Federasiyasının Təhsil və Elm Nazirliyinin rəhbəri Valeri Falkov mayın 1-dək kommersiya təşkilatlarına əcnəbilər üçün rus dili imtahanlarının keçirilməsi, eləcə də onlara sertifikatların verilməsi prosedurunu istisna etməyi tapşırıb.

İqtisadiyyat.az xəbər verir ki, bu barədə idarənin “Telegram” kanalında məlumat verilib.

“Rusiya Təhsil və Elm Nazirliyinin rəhbəri imtahanın keyfiyyətinə nəzarətin gücləndirilməsinə yönəlmiş bir sıra göstərişlər verib. 2024-cü il mayın 1-dək kommersiya tərəfdaşlarını prosedurdan kənarlaşdırılmalı, onlara artıq imtahanların keçirilməsində işləməyə icazə verilməməlidir”, - deyə məlumatda qeyd olunub.

Bundan əlavə, bildirilib ki, hər bir regionda yerli dövlət universitetləri əcnəbilər üçün rus dili imtahanının keçirilməsinə cavabdeh olacaq.

Qeyd edək ki, hazırda Rusiyanın Təhsil və Elm Nazirliyinin tabeliyində olan doqquz ali məktəb, iki dövlət universiteti, bir təhsil nazirliyinin universiteti və Moskva hökumətinin bir təşkilatı xarici dil kimi rus dilindən, Rusiya tarixi və qanunvericiliyin əsasları fənləri üzrə imtahan vermək hüququna malikdir.