2024-cü il təbii fəlakətlər nəticəsində qlobal itkilərin 300 milyard dolları keçdiyi ardıcıl doqquzuncu il olub.

İqtisadiyyat.az-ın araşdırmasına görə, tropik siklonlar 2024-cü ildə dünya üzrə 145 milyard dollar ilə ən yüksək iqtisadi itkiyə səbəb olub. 

"Helene" və "Milton" qasırğaları 100 milyard dollardan çox iqtisadi itki ilə həmin il dünyada ən dağıdıcı fəlakətlər olub. "Helene" qasırğası ötən ilin ən dağıdıcı hadisəsi olub, iqtisadiyyatda 75 milyard dollarlıq ziyana səbəb olub və sentyabr ayında ABŞ-də 243 nəfərin ölümü ilə nəticələnib.

Daşqın hadisələri isə iqtisadiyyata ən çox zərər vuran təbii fəlakətlər siyahısında ikinci yeri tutub. Daşqınlar əsasən İspaniya, Cənubi və Mərkəzi Çində baş verib. Ümumillikdə bu dövrdə qlobal miqyasda təxminən 18,100 insan həyatını itirib.

Təbii fəlakətlərdən ən çox zərər çəkən region isə Asiya olub. Belə ki, Asiya təbii fəlakətlərə ən həssas bölgələrdən biridir. Aşağı gəlirli ölkələr inkişaf etmiş infrastrukturun olmaması, qeyri-adekvat mənzil və ehtiyat resursların olmaması da daxil olmaqla bir çox səbəblərə görə təbii fəlakətlərdən daha çox təsirlənirlər.

Ötən il ən çox iqtisadi zərərə səbəb olan təbii fəlakətlər bunlar olub:

Təbii fəlakət	İqtisadi zərər
Tropik siklon	145 milyard dollar
Daşqın	84 milyard dollar
Fırtına	81 milyard dollar
Zəlzələ	20 milyard dollar
Quraqlıq	18 milyard dollar

 

Gözəl Azadəliyeva