Rusiya istisna olmaqla, bir sıra OPEC+ ölkələri gündəlik neft hasilatını 1,15 milyon barel azaldıblar. 

İqtisadiyyat.az xəbər verir ki, 2023-cü ilin may ayından Səudiyyə Ərəbistanı, Birləşmiş Ərəb Əmirlikləri (BƏƏ), İraq, Küveyt, Oman, Əlcəzair və Qazaxıstan neft hasilatını könüllü olaraq azaldıblar.  

Səudiyyə Ərəbistanının Energetika Nazirliyindən bildirilib ki, neft bazarında sabitliyi qorumaq üçün qabaqlayıcı tədbir olaraq, gündəlik hasilatını 500 min barel azaldacaqlar. Qazaxıstan isə hasilatı sutkada 78 min barel azaltmaq qərarına gəlib. BƏƏ hasilatı sutkada 144 min barel, İraq 211 min barel, Küveyt 128 min barel, Əlcəzair 48 min barel, Oman 40 min barel azaldacaq.

Rusiya baş nazirinin müavini Aleksandr Novak bazar günü bildirib ki, Rusiya neft hasilatının könüllü olaraq sutkada 500 min barel azaldılmasını 2023-cü ilin sonuna qədər uzatmağa qərar verib. Əvvəllər könüllü hasilatın azaldılması Rusiya tərəfindən yalnız mart ayı üçün elan edilmişdi, sonra iyunun sonuna qədər uzadılmışdı.

Rusiya daxil əsas neft ölkələri hasilatlarını 1 milyon 649 min barel azaldacaqlar.

Ölkə       Gündəlik ixtisar (min barel)

Səudiyyə Ərəbistanı - 500

Rusiya - 500

İraq - 211

BƏƏ - 144

Küveyt - 128

Qazaxıstan - 78

Əlcəzair - 48

Oman - 40