Neft İxrac Edən Ölkələr Təşkilatı (OPEC) qlobal neft tədarükünün may ayında əvvəlki ayla müqayisədə gündəlik təxminən 1 milyon barrel azalaraq 100 milyon 200 min barrelə düşdüyünü bildirib.

İqtisadiyyat.az bildirir ki, OPEC-in aylıq hesabatına görə, qrupun may ayında gündəlik xam neft hasilatı əvvəlki aya görə 464 min barrel azalaraq 28 milyon 60 min barrel olub.

OPEC-in qlobal neft hasilatındakı payı 28 faiz olaraq qeydə alınıb. Bu dövrdə OPEC-də ən çox xam neft hasilatı Nigeriya, İran və Anqolada artıb. Səudiyyə Ərəbistanı, Birləşmiş Ərəb Əmirlikləri(BƏƏ) və Küveyt isə xam neft hasilatının ən çox azaldığı ölkələr olub. Əvvəlki ayla müqayisədə gündəlik hasilat Nigeriyada 171 min barel, İranda 61 min barel, Anqolada 54 min barrel artıb, Səudiyyə Ərəbistanında 519 min barrel, BƏƏ-də 140 min barrel, Küveytdə 95 min barrel azalıb.

Eyni dövrdə OPEC-ə üzv olmayan ölkələrdə gündəlik neft hasilatı təxminən 600 min barel azalaraq 72 milyon 200 min barrelə düşüb.