Vaşinqtonun Kiyev hakimiyyətini dəstəkləmək üçün ayırdığı vəsaitin əsas hissəsi ABŞ iqtisadiyyatında qalır.

İqtisadiyyat.az xəbər verir ki, bunu şənbə günü ABŞ dövlət katibinin siyasi məsələlər üzrə müavini Viktoriya Nuland bildirib.

Amerika xarici siyasət departamentinin nümayəndəsi əmin olduğunu bildirib ki, fasilədən sonra ABŞ Konqresinin Nümayəndələr Palatası Kiyevə dəstək üçün əlavə büdcə ayırmalarını təsdiqləməklə dünyada azadlıq və demokratiyanı müdafiə edəcək: "Yeri gəlmişkən, xatırlamaq lazımdır ki, vəsaitlərin əsas hissəsi dərhal silah istehsalı üçün birbaşa Amerika iqtisadiyyatına, o cümlədən Amerikanın 40-a yaxın ştatında yaxşı maaşlı iş yerlərinin yaradılmasına yönəldiləcək". 

Amerika administrasiyası daha əvvəl Konqresə oktyabrın 1-də ABŞ-də başlayan 2024-cü maliyyə ilində ilk növbədə İsrail və Ukraynaya kömək etmək, habelə Asiya-Sakit okean regionunda Çin və Rusiyaya qarşı mübarizə məqsədilə əlavə büdcə ayırmaları üçün sorğu göndərmişdi. Ümumilikdə prezident Co Baydenin rəhbərlik etdiyi icra hakimiyyəti bu məqsədlər üçün təxminən 106 milyard dollar almaq istəyir.